Ab chhod bhi de peecha....

ab chhod bhi de peecha aye gham-e-hayat,
ik umr hui jab khushiyon se rabta tha.

mere zehan me wo shabih aati hi nahin,
log kehte hain kabhi chehra apna bhi khushnuma tha.

main kise ilzam dun aye meri khu-e-aitbaar,
gaye dino me har shakhs mera raazdaan tha.

main bhi ek khushnuma zindagi jee leta magar,
mere logon ka basti me kuch rutba tha.

apni bebasi ka alam ab kya bayan karen,
meri mukhalfat me khada shakhs kabhi mera apna tha.

mujhe gale laga kar wo roya bhi bahot,
mujhse door jaane ka jiska faisla tha.

kuch door se ufak ko main taakta raha,
zameen-o-aasman ko milane ka yahi ik raasta tha.

tu aaj bhi zinda hai to hairan na ho "Aamir"
khuda ka shukr kar tujhme kuch hausla tha.